لا اله إلا الله.. لا اله إلّا الله
لا اله إلا الله.. والنبي صلوا عليه
لا اله إلا الله.. لا اله إلّا الله
لا اله إلا الله.. والنبي صلوا عليه
يوم أقبلت فاح الفرَح طيب وبخور
من اسمها لا من طرت طيبها زار
وإلا ظْهَرت تِمطر رِياحين وعطور
وباح الجمال بنور وعلوم واسرار
امشي على غيمٍ يباريك مبهور
له من سنا روحك رِذاذٍ وأمطار
واسري مثلْ نجمٍ تِبَخْتَر به النور
به تِستدل الشمس وتْطيش الأنوار
يا بَذرة العوجا لك الكل مسرور
من كل جدٍ فيك شِيخه ومقدار
عبيرْ يا روحٍ نِماري بها الحور
عبيرْ يا وَرث المِشاكيل الأحرار
عبيرْ يا نسمة بها الطيب مذخور
عبير يا نَخوة طويلين الأعمار
الزين فيها بين مَنْهِي ومامور
والعز منها جَذْوِةٍ من سنا نار
نوره هَنَاك اليوم ما يكفي شعور
يا عل فرحك والهنا فيض وانهار
واخوانها اللي لا بغت تطلب الشور
تِفازَعَوا دونك صليبين الأشوار
يا بَذرة العوجا لك الكل مسرور
من كل جدٍ فيك شِيخه ومقدار
عبيرْ يا روحٍ نِماري بها الحور
عبيرْ يا وَرث المِشاكيل الأحرار
سلطان يا حظّه خذا بسمة الدور
هو سيفك المسلول بالطيب بتّار
من مَاكَرٍ طيبه مِجَرّب ومخبور
من شَذْرة العارض كِريمٍ ومغوار
ما تكفي الفرحه كتابات وسطور
ولا توفي الدمعة من الغيث مدرار
يالله عسى بيتٍ بنيتوه معمور
ويرزقكم الله بالهنا خير الأقدار
يا بَذرة العوجا لك الكل مسرور
من كل جدٍ فيك شِيخه ومقدار
عبيرْ يا روحٍ نِماري بها الحور
عبيرْ يا وَرث المِشاكيل الأحرار
غطرفي يا دار فالك للسعد
وابشري بالعز لا فاح العبير
وابشري بالعز لا فاح العبير
واستَعد الليل بثيابٍ جِدَد
ليلةٍ ما مثلها خيرٍ في خير
ليلةٍ ما مثلها خيرٍ في خير
ليلنا هلّ الفَرَح به وانعقد
عرس سلطان وغلا الدنيا عبير
عرس سلطان وغلا الدنيا عبير
اقبلي غيمٍ على الروح وبَرَد
اقبلي شمسٍ على الدنيا تنير
اقبلي شمسٍ على الدنيا تنير
غطرفي يا دار فالك للسعد
وابشري بالعز لا فاح العبير
وابشري بالعز لا فاح العبير
للسحاب فْطَرحِتِك برقْ ورعد
يوم شفنا فرحة العمر الكبير
يوم شفنا فرحة العمر الكبير
غير هذا الفرح وش نبغى بعد
نشكر الله ونحمِده خيره كثير
نشكر الله ونحمِده خيره كثير
في عيونك فَرْح نوره انولد
والفرَح أمسى بعين أمك قرير
والفرَح أمسى بعين أمك قرير
يا عسى التوفيق فالك للابد
والسَّعَد دايم على بابك بِشِير
والسَّعَد دايم على بابك بِشِير
غطرفي يا دار فالك للسعد
وابشري بالعز لا فاح العبير
وابشري بالعز لا فاح العبير
