يقولون البكى راحه
وأنا اقول البكى وشلون
وأنا عيني من الفرقا
بكت حتى نشف ماها
يا حظ اللي لهم دمعٍ
وإذا ضاقت بهم يبكون
ويا حظ اللي إذا فارق
له الخلان ينساها
أنا يا حول وش بإيدي
تولاني الهوى بطعون
وإذا سجيت لي همٍ
خذا جروحي وتولاها
تصبحني لهم ذكرى
ويمسيني الغلا بشجون
تنام الخلق وعيوني
لذيذ النوم ما جاها
ألا يا وجد من خلى
محبينه وهو مغبون
وألا ياشينها الفرقا
إذا حدّت على أقصاها
صبرت وعيت السلوى
تسليني وأنا محزون
ولا يدري بحرق النار
غير اللي توطاها
