كلمات قصيدة اشتقت لك اميرة البيلي

اشتقت لك ..

مش قادرة أقولك كيف غيابك مني كسرني

ولا قادرة أقولك إني من غيرك بموت

الفرقة كانت فيا شبه تابوت

والدفنة صوتك لما ودعني

إزاي قدرت بكل قسوة وكبر توجعني

حبيتك ..

وصعب أنكر إني من غيرك تعبت

وإني بشوف صورتك فـ عيون جميع الناس

مش قادرة أصدق إن قلبي انداس

وانك كسرته وغيبت عنه وسيبت

مش قادرة أنكر إني من غيرك تعبت

الله يسامحك علي كل وجعي

وكل حزن سرسبته جوايا

سمك فـ دمي ورغم كونه السم

[ads1]

أنا لسة فاكرة السم دة دوايا

لكن كفاية أن انت علمتني

إني أقولك لأ

وقت اما عوزت تجيلي من تاني

واديك قدرت تعيش ماسك فـ ايدها

فاكرها هتدوملك خليني بس افكرك بيا

أنا كنت ام بكل شئ فيا

أنا كنت ليك وانت اللي مش ليا

علشان كدة :

أنا كنت مش هي ..

والله سهل أني اهجي فيك الشِعر

لكن قصايدي بريئة من سيرتك ..

ظنيت في قلبي الشر وسامحتك ..

لكن معادش في شئ .. يدفعني امسك فيك ..

بقالي 6 شهور بتسبني وارجع ليك

بنسي الوجع عمداً واكدب وأقول بيحب

وبكرة يتعلم وبكرة يتغير !

ومفيش نتيجة لـ صالحي لأ بالعكس ..

بتعود شيطان بيدوس علي قلبي ..

كان ذنبك الإهمال والاهتمام ذنبي ..

المرة دي انا سيبت بلا راجعة ..

المرة دية لو بوست علي رجلي  والله مانا راجعة ..

وبعلو صوتي بقولك استقويت

الهجر بيقسي وهجرتني فـ قسيت

وأنا صعب ابص ورايا علي حاجة ..

مراية الحب مش عامية مراية الحب كدابة !

خلتني اصدق حبك الزايف ..

قلبي اللي شاف كِبرك ..

قال كدب مش شايف

وفضل يجمل فيك ويشوف عيوبك

يبتسم ويقول دية ميزة يا خلق ..

انتوا اللي مش فاهمين .. !

هو الجميل الملاك ..

وجناحه بيساعني !

هو اللي عمره ما سابني ولا باعني ..

– هو اللي عاش عمره بيدوس ويوجعني ..

وأنا اللي كنت بغلب وبـ قصد بنصف فيه

وبقول بيعشقني ..

وهو لا بيعشق ولا حتي كان بيصون !

انا قلبي كيف هيخون ؟

وكيف هيتعود ؟

كل اما اقول هنسي ، حنيني بيزود

ويقولي بتحبيه ، فـ اقول بيوحشني

لكن ورب الخلق ما هعود له ..

ولا يوم هسامح ولا هنسي افعاله ..

لو قلبي يوم هيموت بدون حضنه

هدوس واقول افتكري إهماله

افتكري قالك ايه وقت اما هان روحك

افتكري لما احتاجتي .. مسندكيش

افتكري لما رماكي ..

وعاد يبرر ويقول كلام خايب

افتكري أنك ولا مرة سيبتي ايديه

وهو طول الوقت كان سايب ..

قرر يكون شايب .. بيقع فـ حظك تخسري اللعبة ..

افتكري انك كنتي ليه لعبة ..

زهدك فـ باع واتخلي دون تبرير ..

افتكري إنك ..

طلبتي حبل نجاه

فـ قفل عليكي البير !

علشان محدش ينجدك ..

وانسي يا حلوة كدبة البدايات

الكل فـ الاول بيكون امير بحصان

اتمني وانا ألبي ..

الكل فـ الأول كداب وبيخبي ..

واهي دارت الايام واميرك الملهوف

سابك وشاف غيرك ..

يا تقفي من تاني وتدوسي علي قلبك

يا هتخسري نفسك وهتعكسي سيرك ..