على راس مزمومٍ بدا قافي ومعناي
وقلبي همومه تازن طويق وهضابه
يجر الحنين عروق قلبي واجر خطاي
على مرقبٍ من لاعه الشوق يرقابه
كوت قلبي الذكرى وزاد الهوى شكواي
وجرح المحبة جرح ماتوجد اطبابه
كوت قلبي الذكرى وزاد الهوى شكواي
وجرح المحبة جرح ماتوجد اطبابه
ماغير اتوجد كل ليلة على ليلاي
وجود الشجيع اللي فقد خيرة اصحابه
نديمي دجى ليلٍ تجلى على قمراي
وشعرٍ لعل ان ازرق الدمع يهدابه
طروق الهوى ماترحم الشاعر الغواي
مداهيلها لا خيَّم الليل تنتابه
لاجته الطواري صاخبه ذيبها عواي
غدى كنه اللي مقفيٍ ينقل صوابه
يجوب البسيطه والطواريق رايح جاي
وبينه وبين الهم غارات وحرابه
وانا لو من عدود الغلا ما قطعت ضماي
ابشفق على قلبٍ غدى الهم جلبابه
قضى العمر ازيف ضحكتي للزمان الجاي
وادله فؤادٍ جمر الاشواق يسطابه
والى عسعس الليل وطرالي غرام مناي
تمادى الحنين اللي رسابي على بابه
خياله يجيني كل ليله مع مسراي
صويب المحبة مايجرد من احبابه
وقايع فراقه كنها طلقة الرماي
ليا من رمى قلب الهدف والهدف صابه
اكف الدموع الزرق واصبر على بلواي
وهو من على ريع الهجر يشعب ركابه
أنا لو من دروب الهوى قد طويت رشاي
غرامه ليا طرّي نهب قلبي نهابه
حكمني غرامه حكم يفرض علي ولاي
وبايعت قلبٍ حكم الاحباب يرضابه
سقى الله يوم اسهرت عيني على مركَاي
مع من ربطني بالغلا واعلن غيابه
ابنسى غرامه مير قلبي ماهو نساي
ليا زل ثلث الليل يشفق على احبابه
عجزت اتحمل مر صبرٍ يجيب اقصاي
ولا اطيق مر الصبر لو كان به ثابه
بعد زمله سلم القبايل وضاع جداي
وجاه النصيب اللي خذاه وتنحابه
سمحت وقنعت من الهوى واستوت دنياي
وفي عيني اضحت كل الايام تتشابه
لو ان الزمن جاني على كيفي ومشهاي
ماضاق الصدر والكون ماضاقت رحابه
على كثر ماصادم ليالي عديمة راي
أشوف الامل في رب ماخاب طلابه
عسى مقبل الايام تصفى مع شرواي
ويسلا بها من لافه الهم واومابه
وعسى البارق الشعّال والراعد الدوّاي
مزونه على مرتع دوا الروح صبّابه
