برقٍ لمع والكل من حسنه شهد
واثره جبين الزين ربي مصوّرة
طبت وكن الملعبه مبها احد
اجمل وصوف الحسن فيها مبهره
لاطبت الميدان تاخذهن جلد
وليا وقفت كل العذارى تقهره
الملح والزين بجمالك يُعتمد
انتي اساس الزين وانتي مصدره
نجل العيون الخرس ماتاوي لحد
من حولها عكف الرموش معسكرة
تجرح بها خدٍ بياضة كالزبد
ومن الخجل تنبت ورودٍ مزهرة
يسقي رياحينه بريقٍ من شهد
من كاس توتٍ بالشفاه مخمّرة
ياضامر السرجوف وش باقي بعد
تبقين انتي الأوله والآخرة
من شافها عاف المزايين وزهد
عينٍ على القمرا وعينٍ تسهره
منهو يماريها تعوّذ ثم ركد
والله ماجبنا ولاحتى خبرة
يا الفاتنة منك الصبايا تضطهد
روفي بهن والعفو عند المقدرة
حصنتها من حاسدٍ إذا حسد
وداريتها من شر عينٍ تنظره
