يالخليل امر تدلل من بحور الخليل
القوافي لك عسايف وانا ذللتها
جيت صدفه في طريقي وانا عابر سبيل
ويوم شفتك رحلة الحلم ما واصلتها
أنا كنت ادور التمر من روس النخيل
وشفت ثمرة من ثمار العنب واكلتها
فيك شيٍ من حقيقة وشيٍ مستحيل
مثل فكرة في خيالي ولا وصلتها
كل نسمة جاتك وجابها الجو العليل
والله لو تاقف على راحتي قبّلتها
يوم اشوفك كل ليله ما كنه راح ليل
كل عوجا من كلام العرب عدّلتها
اهتمام السمع ينقص مع الهرج الطويل
وانا مهتم لسوالفك لو طولتها
سولف وخل اهتمامي مع الطرف الكحيل
فيه كل احلامي الضايعة حصلتها
لا تدور من كلامي على حبك دليل
نظرة اعيوني تكفيك لو حلّلتها
كلمة احبك بسيطة ومعناها ثقيل
يكفي ان قلبك سمعها وانا ما قلتها
الحقيقة ندرة الشي فالشي القليل
والعذر من مدة الوصل لا قلّلتها
انت وصلك مثل بيتين معناها جميل
خفت ينقص مستواها ولا كملتها
