جيتي ع بالي اليوم قبل النوم
صرلِك عمر عالبال ما جيتي
شو في حكي ينقال بعد اليوم
وشو بحب حَكياتك شو ما حْكيتِي
بس البُعُد كوّم بقلبي اللوم
ومن بعد ما كنّا بهالدني تَوْم
خنتي حروفي وبالجفا قسيتي
جيتي ع بالي اليوم شو جابك
راشش وجع مطحون ع بابك
وتَتطلعي من البال إنتِ وراضية
إيدك ما رح بتكون منّي فاضية
بُعدِك ع قلبي كان ضربة قاضية
تارك بكفّي دموع ع حسابك
وملعون بيّ العمر بغيابك
جيتي ع بالي اليوم قبل النوم
فرشتي الصدى بالبال واغفيتي
فَتْحِتِ عيونا الشمس بعدِك هَون
وكل الوعود ال بينّا نسيتي
شايل عتب بالقلب وسع الكون
حتى الصبح دبلان ما لو لون
يوم اللي غبتي وعالهدى مشيتي
جيتي ع بالي اليوم شو جابك
راشش وجع مطحون ع بابك
وتَتطلعي من البال إنتِ وراضية
إيدك ما رح بتكون منّي فاضية
بُعدِك ع قلبي كان ضربة قاضية
تارك بكفّي دموع ع حسابك
وملعون بيّ العمر بغيابك
